Akka Pargabuson Ni Dainang

Andorang disihatehonku, dung sidung dainang mangula ulaon na. nang pe naung loja ibana, disangahon dope tikki na laho makkail dekke tu bondar jonok ni huta nami, didok rohana molo dapot annon dekke na, adong ma loppaonna di hami asa adong gizi laho pasimbur daging nami. dung mulak ibana sian pakkailan nai, diloppa ma dekke on tung massai tabo. ditikki mangan hami marloppan dekke na niloppa nai, tabo do attong allangon.
hape dang dohot dainang mangallang impola ni dekke i, hundul do dainang dilambung nami holan mangallang lobi lobi ni sibuk ni dekke na tinggal disuga nai. dung hubereng songoni, lungun rohakku. hulehon ma tu ibana sibuk ni dekke na dipiring hi, alai dijua ibana do huhut didok dainang : “allang ma amang, dang lomo rohakku mangallang dekke”.

Ditikki sikkola SMP dope au ujui, asa adong nian balanjo dohot manggarar uang sikkola nami, borngin ni ari andorang so modom dainang, jotjot do dainang patigor tigor bayon (sejenis rumput) asa adong letekon na laho mambahen lage, digadis do lage on, hepeng sian ima dibahen dainang laho manggarar uang sikkola nami. disada borngin na massai ngali, tarsunggul do au sian podomanhu, hubereng dainang hundul dope disuhi ni podomani sai dinunuti ibana dope mangaletek lage/tikar. hundul ma au laos hudok ma tu dainang “inong, modom ma ho, nungnga tung borngin, ngali muse. hape marsogot manogot nai ikkon mangula dope ho”, nikku. alai morot ma dainang sian hundulan nai mandapothon au mekkel suping, dialusi do au huhut diapus ulu hu, didok dainang : “modom ma ho amang parjolo, ai dang mondok dope au” ninna.

Disada tikki andorang masa hami ujian di sikkola, ditinggalhon dainang do nasa ulaon na asa boi mandongani au laho ujian tu sikkola, di tihos ni ari dipaima ibana do au songoni leleng na. dung makkuling lonceng ni sikkola paboahon naung jumpang tikki sae ujian. ditomu dainang do au di joloni pittu i jala diusehon siinumon naung diboan hinan sian jabu, lambok ma tutu tu aru aru, tabo manorus tu pusu pusu. tung ido pe siinumon natumabo na hea huinum sahat tu sadarion. ala hubereng dainang hir hodok na napaima imah au sian nasogotan, husurdukkon ma tangan hu huhut hulehon siiunumon hi tu ibana, asa tong di dai ibana nian na taboi, alai aha ma didok dainang : “inum ma amang, dang mauas au”.

Dung mate damang alani mandondoni sahit, dainang ido na gabe among dohot inong dihami sude. jala tung massai dangol do parngoluon nami, tamba ari tamba prosuk do parngoluon nami, alani prosuk na godang do akka hombar jabu dohot akka tutur nami mandok tu dainang, asa marhamulian anggiat adong dongan na laho mangula dohot parmudu mudu hami, anggiat adong dalan tamba ni hepeng laho balanjo dohot manggarar sikkola nami, jala sada tikki, hudok do tu dainang, asa marhamulian ma muse, alai didok dainang ma : “lobi lomo do rohakku, rap dohot hamu”.

Dung tammat au sian sikkola, jala dapothu parkarejoan hu na denggan, dainang naung matua nungnga tikkina nian so sian pangulaan. alai ndang olo dainang, laho do ibana ganup manogot tu pasar pagi laho mangalului balanjo na sinagup ari, anggi dohot iboto hu jotjot do manongos hepeng laho balanjo ni dainang, alai tung gomos do dijua dainang sude tongosan nasida, jala dipaulak do sude tongosan i, didok dainang ma : “adong dope hepeng hu”.

Dapot beasiswa do au laho sikkola tu Amerika dungi akkup ni sasude na huula, marupa do na denggan, dilehon do gaji nabalga di au, lobi sian naung hupangido hian dibagas pikkiran hu, alani las ni rohakku. hudok ma tu dainang asa rap lao hami tu Amerika, asa boi berengon ni ibana na ribur jala imbar ni Amerika, dibagas rohakku songon mambalos akka nadenggan na binahen na tu au saleleng on, hudok ma tu dainang asa rap hami borhat tu Amerika, didok dainang ma : “tubamo do au dison”.

Dung lam matua daging ni dainang, marsahit ma ibana apala posi, ikkon dirawat do di rumah sakit, mulak do au sian sihadaoan laho mandulo dainang, atik adong na boi pamalum roha dohot pikkiran na. dung sahat au hubereng ma dainang nungnga sande dang margogo dipodoman na sidung masa operasi. tarida situtu ma dainang nungnga matua, gale pamatang na, maheu dohot bohi na, alai hupatagas ma marnida bohi na dibagasan siholhu tu dainang. nang pe mekkel suping ibana alai tarida do sian bohi na tung apala posi do sitaonon nai dirohakku, tung apala dokdok do rohakku, jala na sopanagaman manetek ilu sian simaololong marnida dainang na pagodang godang au sian sihaetehon hu, na mangajar ajari au boi gabe hudai na tabo, dibereng ibana do bohikku na marsak i, alai aha ma didok dainang : “unang tangis ho amang, ai so hassit hu ae”.

Nuaeng, dao do au sian dainang, alai anggo roha dohot pikkiran hu ndang likkang bohi na sian mata dohot roha hu. ala huboto takkas, mudar na do na durus manubuhon au jala sian mudar na do tongtong mudar namangissir di pamatang hon. hipas ma ho inang, horas ma ho jala ula maa lomo ni roham jala na rumikkot boha sibahen pasonang roham.

-mauliate ma inang.

source: FBPodanauli